هەڤوەغەرێ بارانێ

هەڤوەغەرێ بارانێ


دەما مان د مندامری
وەغەر د سینگێ مندا ڤەژیا
...
د ئێڤارەکا سیبەرا چنارێ
دایک و باب و وەلات
سواری پێلێن وەغەرێ بوون
و من و جیران وچەند وەلاتیان
لسەرێ کۆلانێ، ل نیڤا فلکەی، لسەر دیوارێ مەدرەسێ
ب پاتەیێ ڕەش خوە ژبیرڤەکر.

دەما مان د مندا مری؛
رێ و بار و کەدەر
دل و چاڤ و قەدەر
دەستێن ڤالە و بێ هەڤوەغەر
رێبوارێن رێیا دوور بووین

و...
وەغەر د سینگێ مندا ڤەژیا

هەڤوەغەرێ بارانێ:

بیریا وان رۆژان دكەم
ئەوان رۆژێن ئێکەم هەناسەیێن شیعرێ
ژ سینگێ تە بازدەم دبوون.
ئەوان رۆژێن تەڤ سۆرگولان بێ بشکفتن،
ل پشت شیعرێن مە،
دناڤ دەستێن لەرزانێن مە،
خۆ دڤەشارتن.
بیریا وان رۆژان دكەم..

هەڤوەغەر؛
ل ڤێرە چیێ دی نینە.
ژبلی ئاسمانەکێ بێ داوی
و کەشتیەکا دووگیان
کو لسەر پێلە سەرمەستان،
سەمایا دووریێ ب مە دژەنن.
ل ڤێرە؛
نە ئاوازا باخچەی و
نە سروودا سۆرگولەکێ
تێرا بەهانەیەکێ ناکەن؛
بۆ هەمبێزا وان تلێن تە.
سحاران ل ڤێرە،
رۆژ ژ زکێ ئاڤێ ژ دایک دبیت و
ل ئێڤاران ب ئارامی جهێ خۆ ددەتە هەیڤێ.
هەڤوەغەر،
ل ڤێرە و د جەرگێ ئاتلانتیک دا؛
ئوقیانۆسەکێ بیریا تە دکەم

بارانیمە و د وەغەرێدا:
شەڤ ب دەردە،
و تاڕی...
لەشێ رەشێ شەڤێ و
تلێن من بیریا ڤەمالینا پرچا تە دکەن.
دل ڤولکان،
چاڤ لێمشت،
لەش زیلزال،
و تەڤ هەبوون؛
دووربوونێ ژ دووریا تە دخوازن.

بارانی...
هەڤوەغەر...
دڤێ وەغەریدا،
تەڤ شیعرێن من ژ دلێ باڵندەیەکی دەردکەڤن:
کو شەڤەکێ دخواست د ئاسمانێ چاڤێن تەدا بفریت،
و ژ کانیکێن زەلالێن دلێ تە تێرئاڤ ببیت.
هەڤوەغەر،
لڤێرە و لژێر دەستێن خۆدای
ئاسمانەکێ بیریا تە دکەم.

محەمەدعەلی یاسین تەها
٠٤/٠١/٢٠١٣
گزیرتێن کاناری، ئیسپانیا

عەشقەلەرز

(عەشقەلەرز)

 کەس لڤارا نینە؛
پەیاسەیەکێ دگەل من بهزرینە،
جهـ ژ من؛
جگارە ژتە؛
عەشق ژ خۆدای،
ترس ژ باژێری.

کەس لڤارا نینە؛
دەستەکێ لسەر خەریبیا مندا بینە،
دل ژ من؛
هەمبێز ژ تە؛
رەحم ژ خۆدای،
شەڤ ژ باژێری.

کەس لڤارا نینە؛
تێهنی بوونا من بجەربینە،
لێڤ ژ من؛
ماچ‌ ژ تە؛
باران ژ خودای،
بیابان ژ باژێری.

کەس لڤارا نینە؛
تەنێ بوونا من بژینە،
مەیخانە ژ من؛
ئاشۆپ ژ تە؛
رەنگ ژ خۆدای،
دەنگ ژ باژێری.



محەمەدعەلی یاسین
14-02-2013
لیسبون، پورتوگال