هەڤوەغەرێ بای
کەڤنەپەرستێ هاڤی و
هەڤالێ رێکێن بێ داوی
لڤان دران ئەزێ بێ تە
ل میحرابا رووگەها بای
گەرماتیا هەمبێزەکێ دوعادکەم
ژ مێژەیە، هێژ نەهاتی
سەرهاتیا ڤێ وەغەرێ پاشڤەمایە
و هێشتا ژی ب تەڤ شەڤان
ژ ترسێن ژتە بەرزەبوونێ
ستێرەکێ بۆ ژڤانا شەڤا بهێت نیشان دکەم
گەر باران هات؛ ئەو ئەز بەرزە
و ب شەڤان
د روهنترین کولانێن ڤی باژێریدا
ب لەپەقوتان
ئەزێ تاری لتە گەرم
ب لەپەقوتان
ئەزێ تاری لتە گەرم
باژێر بێ تە دەردەدلە
پڕی مرۆڤێن بێ دلە
باژێر بێ تە
دناڤ گازیێن گرتیێن چاخێ کورە دا
بەرزەبوونا هەواریێن گوریکرنا دایکەکێیە
باژێر بێ تە
دانپێدانا جگارەکا ب نیڤیە
د بێ جانیا دەستێن مندا
هێشتا لڤێرە بارانە، وەرە
بیریا تە دکەم، وەرە
بەرزەبوویمە، وەرە
شەڤ تەڤ بورین، وەرە
وەرە داکو ب حزوورا تە
نوشینا پێکێن شەرابێ قەزا بکەم
٢٧-١٠-٢٠١١، لیزبون، پورتۆگال
ئەڤ هەلبەستە ل رۆژناما وار هژمارا ٥٠٧ بەلاڤ بوویە و ئەڤا لخوارێ ب دەستێن زێرینێن دیزاینەر عصام حجی هاتیە بجهکرن.
نوشینا پێکێن شەرابێ قەزا بکەم
٢٧-١٠-٢٠١١، لیزبون، پورتۆگال
ئەڤ هەلبەستە ل رۆژناما وار هژمارا ٥٠٧ بەلاڤ بوویە و ئەڤا لخوارێ ب دەستێن زێرینێن دیزاینەر عصام حجی هاتیە بجهکرن.
No comments:
Post a Comment