بەندەمان

بەندەمان

نە تو ل ئاسمانان

نە ئەز ل ئەردیمە

لمن بگەرە

دلێ من وارگەهێ تە

دلێ تە هەوارگەهێ من

لمن بنێرە

ژ شوونپیێن رەشەبایێن لسەر ئەردی

تەڤ ئاسمان د شەرمزارن

وەرە داکو

بۆ گەردەنا گونەهکارا خوداوەندان

ستوڤانەک ژ دلێن پاک  بڤەهوونین

لتە دمینم

ب چاڤێن بارانیێن ئێڤاریەکا پاییزی

لتە دچم

ب دەستێن زڤرێن دوور ژ هەمبێزان

کو ئەز و تو لڤی واری

دگەل دەنگێ پەقینا ڤولکانێن سەرێن مرۆڤان

پەیدا بووینە

و دگەل بانگێ سرودا دیکتاتوریێ د گۆهێن مەدا

ژ دایک بووینە

لێ نە ئەز دمینم

نە تو

نەژی شرشرا ئێڤاریێن خەمین

دبەر لێڤێن ئاڤێن سۆردا

لڤی واری

ل رۆناهیێ مە نابینن

ل تاریێ لمە رادهێلن

وەرە بەلکو لهەڤ بگەهین

بەلکو جاران

کێلیکە هەواریێن خوەیێن ریس

ب هاڤی رۆندکێن پیرەکێ کال بنخێڤین

و بەلکوژی

بۆ گوهێ تەڤ ژ دایک بوویان

ب هاتنا تە

 هێژاتیا ئازادیێ بگڤێشن

٢٤.١١.٢٠١١

لەشبونە، پورتوگال

ئاسمانەک ژ بارانێ

ئاسمانەک ژ بارانێ

بۆ برایێ هێژا، چیرۆکنڤیس ئیسماعیل هاجانی د بیرهاتنێن بارانێن دەشتێدا

  

تا دەشتێ

تا بارانێ

تا ئاسمانی
گەلەک نەمایە

دێ هێم و ژ ئاسمانی، بارانێ بۆ دەشتێ خوازم

لبیرا تەیە؟

مە دکر هەوار؛

ل دەشتێ ئەم لشەڤێ دگەریاین

ئەم لبەر بارانێ دلەیزین

گریانێن مە؛ باوەش ژ هەڤدوو ددزین

و باران لمە هەر دباری، هەر دباری

گەلەک نەمایە  تا ئاسمانی

جاران دەما دبوو باران:

 دلێ مە دگرت

و بتنێ دەشتێ باوەش ڤەدکر

و ل دەشتێ

نە تە،نە من، نەژی خودای

 هزرا بارینێ نەدکر

ئەم بخوە دبووینە بارین و

دبووینە چپچپا چپکان

و چ بارانان لڤێ دەشتێ

روحا مەیا تێهنی و هشک

تێرئاڤ نەدکر

لژێر ڤی ئاسمانی

ئێدی باران ناباریت؛

دەشتێ شینیە

شوونپیێن مە دکەتە هەوار

بو سەمایا ئاسمانەک ژ بارانێ

پورتوگال، لەشبونە

١٩.١١.٢٠١١

سووندا مەزن

سووندا مەزن 



ب ناڤێ ئازادیێ،
ب ناڤێ خودای،
ب ناڤێ عەشقا پاک
سووند دخووم

ب کێلیکا کو کاروانێ شاعرێن سەرباز گیان سپاردی
ب ئێڤاریێن کو نیسانووک بۆ رۆژئاڤابوونەکا ڤارێ پارڤەکرین
ب چار چاڤێن چاڤەرێ یێن ئەوان چیایێن چەمیایی
سووند دخووم

ئەز بهەمی ساڤاتیا خوەڤە لگەل تە مەزن
و بهەمی مەزنیا خوەڤە بێ تە هیچم
سووند دخوم بتە، ب من، ب مە
بیریا تە دکەم

رێیا مە دوور بوو لێ
تە کورت ڤەبڕی
سووند برێکێ
هێشتا لرەخێن جادێ 
لدۆر خوە دگەڤزم
ژ ئێشا ژ رێکێ داڕەستیە هناڤێن من

لێ تو هەرە؛

هەڤوەغەرا من
وەغەر خێربیت

١٥.١١.٢٠١١

لیزبون، پورتوگال

گریانێن من تە نەدیتن

گریانێن من تە نەدیتن
"دیاری بۆ وێ رۆژێ یا کو ب شەڤەکێ هاتی و ب شەڤەکێ چووی و تەڤ رۆژ هێلان تاڕی"

ئێدی نزانم:

ب سلاڤەکێ خوش بم و شاد

یان ب خاترخواستنەکێ، خەمگین

ئیشەڤ نزانم :

بگریێم ژ ئێشا بێ تە مانێ

یانژی بکەم شینی

بمینم بێ پەیڤ

و چوونا تە تەماشە بکەم

د وەهانە ئەڤین

ئەڤینا درەوین، درەوان دکەت ل ئەڤینا راست

و د باوەشێدا درەوان لخوە دکەت ئەڤینا راست

ئەڤینا راست، ئەڤینا راست، ئەڤینا راست

ئەز هێژ تێنەگەهشتیمە

نە لەزا تە د هاتنێدا،

نەژی چوونا تە د لەزێدا

بتنێ خوزیکێن تە:

تو دزانی بهەمی رێکان

بێ بەرزە بی

تو بخوهاتی و بخو ژی چووی

و ئەز بتنێ ڤێ دزانم:

کو نزانم و نزانم: ژ تە بێژم ب کەرب و کین

13.11.2011

Lisbon, Portugal