بەندەمان
نە تو ل ئاسمانان
نە ئەز ل ئەردیمە
لمن بگەرە
دلێ من وارگەهێ تە
دلێ تە هەوارگەهێ من
لمن بنێرە
ژ شوونپیێن رەشەبایێن لسەر ئەردی
تەڤ ئاسمان د شەرمزارن
وەرە داکو
بۆ گەردەنا گونەهکارا خوداوەندان
ستوڤانەک ژ دلێن پاک بڤەهوونین
لتە دمینم
ب چاڤێن بارانیێن ئێڤاریەکا پاییزی
لتە دچم
ب دەستێن زڤرێن دوور ژ هەمبێزان
کو ئەز و تو لڤی واری
دگەل دەنگێ پەقینا ڤولکانێن سەرێن مرۆڤان
پەیدا بووینە
و دگەل بانگێ سرودا دیکتاتوریێ د گۆهێن مەدا
ژ دایک بووینە
لێ نە ئەز دمینم
نە تو
نەژی شرشرا ئێڤاریێن خەمین
دبەر لێڤێن ئاڤێن سۆردا
لڤی واری
ل رۆناهیێ مە نابینن
ل تاریێ لمە رادهێلن
وەرە بەلکو لهەڤ بگەهین
بەلکو جاران
کێلیکە هەواریێن خوەیێن ریس
ب هاڤی رۆندکێن پیرەکێ کال بنخێڤین
و بەلکوژی
بۆ گوهێ تەڤ ژ دایک بوویان
ب هاتنا تە
هێژاتیا ئازادیێ بگڤێشن
٢٤.١١.٢٠١١
لەشبونە، پورتوگال
silva heja Mohemed, ev cend piyv bersiva van piyvêt te yêt ciwan wek shîrê dayka zelal,
ReplyDeleteباێ سوور
به‌لێ کورێ من
ئه‌ز و تو هه‌ر دوو ل ئه‌سمانێ هیڤیانه
به‌لکی روژه‌کێ،
توڤێ ولاته‌کێ ئازاد بچینین
ژ بیر نه‌که....
دایکا ته، برینا ئه‌نفالایه.
تو ژی ژانا وێ یێ.
چه‌ند من خوه داقوتا، ژ گونه‌هکارا
و
وان خوداوه‌ندێن ته ژ نو ، ناس کرین.
هه‌ر خوه ب که‌زیێت من ڤه دهه‌لاوستن
لاوێ من...
من تو یێ ب روندکا فرشك کری، ژ بیر نه‌که.
و
ئه‌و روندکێت ماین ، من ب مه‌رجانیا چاڤێن خوه
یه‌ک ب یه‌ک
ب داڤا خه‌ما هوناندن .
و کرن عاشق به‌نده‌ك،، بو گه‌رده‌نا
وی خودایی.
ئه‌رێ لاوێ من...
من گۆت:
به‌لکه بیرا ته نه‌هێت، ده‌ما
ئه‌م ل مه‌ژیێ وان مروڤان د هه‌لنگفتین
من ده‌ستێن خوه ب خوینا وان خه‌نه د‌کرن
د بیردانکا روژێدا دڤه‌شارت
و هنده‌ک ژی بۆ زاروکێن پاشه‌‌ڕۆژێ هل گرتبون،،
دا شه‌ڤێن جه‌ژنا تبلێت خوه
نه‌قشێ وه‌ڵاته‌کێ سور ل سه‌ر نیگار بکن.
ئه‌رێ لاوێ من...
به‌ژنا ده‌یکا ته ل به‌ر
قێریێت پاییزا زه‌ر بویه
نه بازبه‌ندیێت مه‌لا
نه ژی ته‌رانیمێت قه‌شا
نه شیایه ئێشا ره‌ش
و تبلێت مه یێت سور
و سلاڤێت مه یێن ب
ئازادیێ پێچاین
ب خودایه‌کی ڕا بگه‌هینیت.
سلوی گولی
2011/ نۆڤێمبه‌ر 27
Göteborg