محەمەدعەلی یاسین تەها
دەما باش لوان کەسان دنێرین یێن کو د بیاڤێ کارگێری و رێڤەبرنا وەلاتیدا
کار دکەن، گەلەک کێم ژوان هەنە کو د ئاستەکێ گونجاییدا بن بۆ وی کارێ پێ هاتینە
راسپاردن و دەما هەول ددەی بەرسڤەکێ بۆ پرسیارا خوە پەیدا بکەی کا ئایا بۆچی ئەڤ
کابرایە لڤێرەیە و نە کەسەکێ د ئاستدا، دێ پتریا بەرسڤان ب رەنگەکێ رازیکەر
هەولدەن بۆ تە دیار بکەن کو کەس ژ ڤی باشتر نینە و دەما کوورتر لێ دنێری دێ بینی
کو نە بتنێ ژ ئەنجامێ نەبوونەکێ "فەراغەکێ" یێ هاتی بەلکو ژ کۆنجەکێرا
دگەهیتە هندەک کۆنجێن دی. دێ بینی جیاوازیا وی لگەل خەلکەکێ ئاسایی یێ کو دبیتن چ
پەیوەندی ب کاری ڤە ژی نەبیت گەلەک نینە؛ لەوما ژی دەما خەلک دڤی ئاستیدا وی مرۆڤی
دبینیت، دەملدەست هەست دکەت کو دڤێت لجهێ وی بایە و د پتریا جاران خوە ژوی هێژاتر و باشتر دبینیت. ئانکو رۆهنتر بێژم،
ئەڤ کەسێ د ئاستێ رێڤەبرنێدا چ تایبەتمەندی یان شیانێن جودا نینن کو وی خەلکێ
نورمال لجەم نەبیت، ئەڤجا هەموو دشێن ببنە ئەو و جاران داخوەیانیێن خەلکێ نۆرمال
گرنگترن ژی ژ کاربدەستان.
مەرەما من ژ ڤێ ئەو نینە کو دڤێت خەلک بێدەنگ بن و چ ڕاو بۆچوون لدۆر
کاودانان نەبن، بەلکو بەرۆڤاژی، پێدڤیە د سەربۆرێن دێمۆکراسیدا خەلک بۆچوونا خوە
پشکدار بکەن لێ سنۆر و مەرجێن خوە هەنە و ئەوا ل وەلاتێ مە هەی، یا ژ رادەی بدەرە؛
هەرکەس بوویە سیاسەتڤان.
ئالیێ دی ئەوە کو وەرگرتنا پوستێ رێڤەبرنێ وەکو دەستکەفتەکێیە کو دبیتن تا
دووماهیکا دونیایێ ژی ژیانا وی کەسی و دەردورێن وی پێ بهێتە گهۆرین. د دەمەکێدا کو
ئالیێ دروستێ وێ ئەوە کو پوست زێدەتر وەکو بەرپرسیارییەکا پرۆفێشنال بیت و لگۆر
شیانێن وی کەسێ کاندیدکری و پشتی دەربازکرنا پرۆسێسەکا دیارکری و شەفاف بدەستڤە
ئینابا و هووراتیێن کارێ وی ژی بۆ خەلکی د دیاربان. لێ سەرهلدانا ڤێ سەختە د
زەمینەیەکێ مینا کوردستانێ.
کەس نابێژیت ئەڤە شولا من نینە دا نەکەم، کەس ژی نەشێت بێژیتە کەسێ شولا تە
نینە ژبەر کو دێ بەرسڤ ئەڤە بیت: پا شولا کێیە؟!
براستی ژی، پا شولا کێیە؟
تا نهۆ دیسکورسا "خطاب"
سیاسییا کوردی ئاراستەی مێشکێ خەلکی نەبوویە و کێم جاران برەنگەک سیستێماتیک و
پلاندایی لهەمبەری خەلکی دیار بوویە و د زێدەهیا زۆرا دەلیڤەیاندا ئەڤ دیسکورسە
سەرەدەریێ دگەل دلێ خەلکی دکەت و ب دیارترین رەنگێن ئایدیال دۆرهێلی دیار دکەن و
ئەڤە دبیتە ئەگەر کو ئالیێ پراگماتیکێ دۆرهێلێ سیاسی لبەر چاڤێن خەلکی دیار نەبیت
و د ئەنجامدا ئالیێ ئایدیال دبیتە کارێ هەر کەسێ کو ب پەیڤێن بریقەدارێن مینا
وەلاتپارێزی، نەهێلانا دوژمن و خیانەتکاران، راست و دروستی، خەبات د رێیا دروست
دا... هتد بشێت بئاخڤیت، و دئەنجامدا ب ساناهی دبیتە زارڤەکەرێ سیاسی.
No comments:
Post a Comment