کی تێروریستە؟ مالیکی، یان جبوری، یانژی ...؟

محەمەدعەلی یاسین تەها

ئەڤ گۆتارە راوەستیانەکە لسەر دیدارا ڤێ داویێ یا کەنالێ الشرقیە بەرنامێ (بین قوسین) دگەل مشعان جبوری، ئەندامێ بەرێ یێ پەرلەمانێ عیراقێ، یێ کو د دەلیڤێن جودا دا ب ناڤ و سەردێرێن جودا دهێتە نیاسین و باسکرن. دیسان هەڤبەرکرنا ڤێ دیدارێ یە دگەل دیدارەکا دی بەریا نێزیکی دوو سالان لسەر کەنالێ ئەلجەزیرە ل بەرنامێ (الاتجاه المعاکس) ژ پێشکێشکرنا فیصل القاسم دگەلدا ئامادەبوویێن بەرنامەی هەرئێک ژ مشعان الجبوری، کو داکوکی لسەر شەرمزاربوونا حکومتا عیراقێ، و ب تایبەتی کەسێ مالیکی بخوە، د دۆکیۆمێنتێن ویکیلیکس دا دکر، و لهەمبەری وی فەوزی ئەتروشی، بریکارێ وەزارەتا رەوشەنبیریا عیراقێ، کو نوونەراتیا حکومەتا عیراقێ دکر و بەرەڤانیەکا بێ ئێک و دوو ژ مالیکی دکر.  

مشعان الجبوری ئێک ژوان ناڤانە کو ب تایبەتی پشتی ژ ناڤچوونا رژێما بەعس پتر هاتە دیاربوونێ. هند ژ مە هەنە کو وی وەک خودانێ گۆڤارا الاتجاه الاخر دناسین و هند ژی وی ب سەرکردێ کوتلا ئازادی و ئاشتبوونەڤا عیراقی ل پەرلەمانێ عیراقێ دناسن. دیسان بناڤێن جودا د درێژیا سالێن بوریدا هاتیە ناڤکرن: جاران سەرکردەیەکێ گرنگێ ئوپوزیسیۆنێیە کو پشکداری د ئازادکرنا عیراقێدا کری. جاران ژی ئێک ژ فەرمانبەرێن سەددامی یە کو باوەری ب دێموکراسیێ نینە. جاران دهێتە نیاسین وەک تیرۆریست وخودانێ کەنالەکێ بەلاڤکرنا هزرا تیرۆرێ وەک "الزورا" یە. جاران ژی ب وان دەستپیسێن کو پشکداری د دزین، ژناڤبرن و وێرانکرنا سامانێن گەلێ عیراقێدا دەست هەین و ....تا داویێ، ئانکو ڤی مرۆڤی هژمارەکا زێدەیا تایتلان ل گۆر دەم و کاودانان وەرگرتینە.

جبۆری بەری نێزیک دوو سالان، پشتی دووەم هەلبژارتنێن عیراقا پشتی سەدامی برەنگەکێ ئاشکەرا کەفتە د چەپەرێ ئیدانەکرنا حکومەتا عیراقێ ب تایبەتی سەرۆکێ وەزیران نوری المالکی کو لگۆر دیتنا "مشعان" ی پێدڤیا سەردەمیانەیا سیاسی ل عیراقێ ئەو بوو کو باوەریا دەستهەلاتێ ژ مالیکی بهێتە ستاندن. جبۆری دگۆت کو مالیکی دەست د کوشتن و ژناڤبرنا پتر ژ سەد و پێنجی هزار وەلاتیێن عیراقیدا هەیە و مرۆڤەکێ نەیێ باوریێ یە د چ کاودان و دەلیڤەیاندا. زێدەباری وێ یەکێ کو لگۆر دیتنا جبۆری یا وی دەمی، مالیکی زەلامێ ئیرانێ یە و دڤێت بهێتە سزادان و رادەیەک بۆ خیانەتا وی و مرۆڤێن وەکو وی بهێتە دانان.

ئەگەر تەماشەیی دیتنا جبۆری یا وی دەمی بکەین، و هەڤبەر بکەین لگەل دیدا نهۆیا سەرکردایەتیا کوردی و هند گرۆپێن دیێن عیراقی، گەلەک جۆداهی دناڤبەرێدا نینە و نهۆ کورد و هەڤپەیمانێن وانژی وەسا هزر دکەن.

ئەڤ دیتنە ب ئاشکەرایی بەری دوو سالان د بەرنامێ (الاتجاه المعاکس) ل کەنالێ ئەلجەزیرە ژ لایێ جبۆری ڤە هاتنە دیارکرن. لهەمبەری وی، فەوزی ئەتروشی، بریکارێ کوردێ وەزارەتا رەوشەنبیری ل عیراقێ، ب توندی بەرامبەری راوەستیا و جبۆری ب تیروریست و تێکدەر و گەندەل و ... هتد، دا ناسین و تەنانەت قەبول نەدکر کو جبۆری ناڤێ مالیکی ب بێرێزی بینت، بەلکو دگۆتێ " رێزێ ل خوە بگرە، تو یێ باسی سەرۆکوەزیرێن هەلبژارتیێ گەلی عیراقێ دکەی". هەرچەندە د وی بەرنامەیدا جبۆری دبێژیتە ئەتروشی کو تو یێ ل جهەکێ شاش راوەستیای و بەرەڤانیێ ژ ناحەقیێ و ژ دوژمنێن سەرەکیێن کوردان دکەی، لێ ئەتروشی یێ رژد بوو کو یێ بەرەڤانیێ ژ راستی و حەقیێ دکەت.

بتنێ دوو سال دەرباز بوون. هەر ئەو جبۆری ڤەگەریا، لێ ئەڤجارە ب سازەکا سەر وبن جوداڤە دلەیزی. لگۆر وان داخویانیێن لرۆژا دووشەمبیا بۆری د دیدارا خودا دگەل کەنالێ ئەلشەرقیە داین، جبۆری یێ ئامادەیە هەڤکاریا تەمام لگەل المالکی بکەت بۆ بەرسینگگرتنا کوردان ژ داگیرکرنا خاکا عیراقێ. زێدەباری چەندین تومەتێن دی کو دیارترینا وان ئەوە کو جبۆری کوردان شەرمزار دکەت ب وێ یەکێ کو تاگری و هەڤرکیا ئیتنیا عیراقێ لسەر دەستی کوردان هاتیە گورێ.

ئێکسەر پشتی ڤان داخویانیان، هند میدیایێن کوردی و هندێن دیێن دووری سیاسەتا مالیکی دەست ب ناساندنا جبۆری کر ب تیرۆریست، خایین، بێ بنەما، و ... هتد.
جارێ ئەم باسی نەجێگیریا هەلویستێ سیاسییێ جبۆری ناکەین و بێ وێ یەکێ کو ئێتیکێن سیاسی ژی بینینە بەرچاڤ، ئەم باسی یاریا سیاسەتێ ژی ناکەین کا کی باشتر یاریێ دکەت یان نە، بتنێ ب دیدەکا کوردی پێدڤیا ڤێ پرس دبینم کو: کی، کیە؟ و هەروەسا کی، کەنگی دبیتە کی و کەنگی نە؟

پرسا دی هەر گرێدایی یە: ئایا چ جودایی و جیاوازی دناڤبەرا هەلویستێ جبۆری یێ بەری دوو سالان و هەلویستێ ئەڤرۆیێ کوردان هەیە؟

چ تشتە کو جبۆریێ وی دەمی دکەتە هەڤدژێ مالیکی و جبۆریێ نهۆ دکەتە هەڤالێ مالیکی؟

ئایا کورد دڤێ یاریێ دا توشی چ دبیت د کاودانەکیدا کو بەری دوو سالان ب بەرەڤانیکرن ژ مالیکی، کوردان جبۆری هەڤدژ ددیت و نهۆ ژی ب هەڤدژی دگەل مالیکی، کورد بەردەوام جبۆری ب هەڤدژێ خوە دبینن؟

هەڤدەم ئایا ئەم ڤێ بەرچاڤ دکەین کو مالیکی ب شارەزاییڤە شیایە د ئێک دەمدا کوردان بۆ بەرسینگگرتنا جبۆریێ هەڤدژێ خوە بکار بینیت و نهۆ ژی ب هەر ب هەمان کاراکتەران لێ ب ستراتیژییەکا دی، جبۆریێ هەڤدژێ خوە بەرامبەری کوردان بکار دئینیت؟ 

بەرسڤا ڤان پرسان د ڤەکرینە، بۆ مە، بۆ وان و بۆ هەمیان، یا گرنگ بتنێ ئەوە هزرا خوە بکەین.

کیژان بهێتە گهۆرین: حکومەت یانژی مللەت؟

محەمەدعەلی یاسین تەها

سێشەمبا بوری کی ل هەولێرێ بوو؟ کی چوو لسەر ئاڤاهیێ پەرلەمانی؟ ئایا هەروەک هند دەزگەهێن ڕاگەهاندنێ ئەو بناڤ کرین هژمارەکا توندرەو و تێکدەران بوون؟ ئایا هەروەک ئالایێن وان بلند کرین خەلکێ سعودیا بوون؟ ئایا هەروەک هندەک ئالیێن سیاسی ددا زانین پارت و گرۆپێن کوردی تێدا دەست هەبوون؟ یانژی هژمارەکا خەلکی بوون کو ژ بەر ڤان هەمو فاکتەر، ئەگەر و پاڵدانێن جودا جودا ڤە رژانە سەر جادەیان و لژێر دروشمێن جودا دەربرین ژ خوە دکرن؟ و ژ هەمیان گرنگتر، بۆچی؟

ئەگەر ئەوێن لوێدەرێ کورد بن و دلێ وان ب پەرلەمانێ کوردی ڤە نەبیت یێ کو دەستکەفتیێ وانە ژ ئەنجامێ سەدەیەکا قوربانیدانێ، من چیێ دی نینە بێژم. ئەگەر موسلمان بن و هەروەک چەوا بەرگری ژێ دهاتە کرن کو ئەو ئالایێ لسەر ملێن وان نە ئالایێ سعودیێ یە (ژبەر کو شیر تێدا نینە) و ئەو ئالایێ ئیسلامێ یە، ئەز دپرسم ئەو چ جۆرە ئیسلامە کو توندیێ د هەلبژێریت و رێکێ نادەتە سەرەدەرییا ئارام بۆ رووبەرووبوونا هەر بوویەرەکێ؟ ئەگەر ژی پارت و حزبێن کوردی پشکدار بن د بوویەرێن ڤی میناکیدا، قەت نەشێم تێبگەهم کو دێ تا کەنگی لهەڤنەهاتن و هەڤرکی و ئێکدوو قەبولنەکرن یا بەردەوام بیت دناڤبەرا پارتیێن کوردیدا.

ئەڤ بابەتە دڤێت ژ دوو ئالییانڤە بهێتە تەماشەکرن: حکومەت و مللەت.

حکومەت ئێکەمجار بەریا هەر تشتەکی بەرپرسیارە بەرامبەر یاسادانان و حوکمێ یاسایێ، هەردیسان ژ ئالیێ جێبەجێکرنا یاسایێ ڤە دڤێت دەستهەلاتا یاسایێ زاڵبوونەکا بێلایەنانە لسەر هەموو ئالیێن دی هەبیت بۆ وێ یەکێ برەنگەکێ کارا و دوور ژ هەر پابەندی، کارتێکرن یان باندۆرێن جوداڤە کاردانەڤە هەبیت. ب دەربرینەکا دی، ئانکو دڤێت خەلک هەست ب سەروەری و بێلایەنیا یاسایێ بکەت و حوکمێ یاسایێ بشێت وێ باوەریێ بۆ جڤاکی چێکەت کو هەرکەس یەکسانە بەرامبەر یاسایێ. ژ بۆ جێبەرجێکرنا ڤێ، حکومەتێن خوەدی سەروەری هەول ددەن زێدەباری راستڤەکرن و گونجاندنا یاسایان هەروەسا بیروکراسیەکا موکم بکار بینن بۆ جێبەجێکرنێ. بەروڤاژی ڤێ، حکومەت توشی لاوازیێ دبیت و سەروەریا وێ دکەڤیتە ژێر پرسیارێ. بڤێ یەکێ دەملدەت جڤاک هەست ب نەدادیێ دکەت و کاردانەڤە د گەلەک چوارچووڤاندا رووددەن. د دەلیڤێن ڤی میناکیدا فشار ژ تەڤ ئالییانڤە ژ ناڤا جڤاکی دکەڤنە سەر حکومەتێ و زوو ب زوو سیستەمێ رێڤەبرنی ژ بال مللەتیڤە توشی ئازارێ دبیت. ئەڤە ژی چ ژ ئالیێ پالدانێن سیستەماتیک و رێکخستیڤە بیت کو ژ ناڤا جڤاکێ مەدەنی سەرهلبدەن، یانژی برەنگێن جودایێن دەربڕینان، و هند جاران دەستێن دەرەکی ژی دهێنە د ناڤا سیناریویێ دا و ئەڤ چەندە حکومەتێ توشی فشارێ دکەت. ئانکو ب کورتی، لاوازیا بجهکرنا یاسایێ یەکسانە دگەل پەیدابوونا ئالۆزیێن ناڤخویی. ل ڤان جۆرە دەلیڤەیاندا حکومەت دڤێت گهۆرینان بکەت ئانکو بهێتە گهۆرین.

مللەت ئانکو خەلک د هەمان دەمدا دڤێت ئەو ئاگەهی هەبیت کو حکومەت ژی پشکەکە ژ وان بخوە و ئەڤە ب تایبەتی دوان سیستەماندا کو - خوە ئەگەر دێموکراسیێن تەمام ژی نەبن - خەلک ب خوە نوونەرێن خوە د هەلبژێرن. و بێدڤیە خەلکی رەنگڤەدانێن رێکخستی و دوور ژ بیر و بۆچوونێن فاناتیکی و توندرەو ژ بۆ سەرەدەریکرنا پرسێن جۆدا دا هەبیت. ئەڤە ب تایبەتی دوان دەمێن کو خەلک هەست ب نە یەکسانی و پێشێلبوونا مافێن خوە دکەن کو پێدڤیە دڤان دەلیڤەیاندا ب ئاگەهانە و دوور ژ زیانگەهاندنی بۆ دەستکەفتێن نەتەوەیی رەفتارێ بکەن. بەروڤاژی ڤێ چەندێ دڤێت مللەت بهێتە گهۆرین.

ژ ئەنجامێ هەڤبەرکرنێن لسەری هاتین و ب بەرچاڤوەرگرتنا کەشێ زاڵ ل کوردستانێ لڤان داویان وەک نموونە، بۆ مە دیار دبیت کو لسەر ئاستێ هەردووان مە پێدڤی ب گهۆرینان هەیە: حکومەت و هەروەسا مللەت.

پەشێو و کەر

محەمەدعەلی یاسین

ئەز پەیوەندیا دناڤبەرا عەبدولا پەشیو و کەری دا نزانم، لێ هەر چی بیت، وەک پەیوەندیەکا کوو و دوور دیارە. پەیوەندیەکا هند ب هێز کو جاران بێ پەنابرن بۆ کەری، رێکێن چارەکرنێ پەیدا ناکەت بۆ وەسفا سڤککرنا هەر تشتێ وی دڤێت.

بێ کو باس ل داکۆکیکرن ل مافێن جانداران و ب تایبەتی کەران بکەین، بۆ مە هەمووان دیارە کو چ باش بیت یان خراب، د کلتوری کوردیدا وەسفکرنا کەس یان ئالیەکی ب کەر، سڤکاتیکرنە ب وی کەسی. هەر لسەر ڤێ رێبازێ و ڤی تێگەهی پەشێو د ئێک ژ هەلبەستێن خوەدا بناڤێ "دێوەرە و کەر" کو ل پارچەیا داویا وێدا دبێژیت:

"کە من کەر بم، باربەربم، فەرقی چیە، دەرد هەر دەردە، کەری تۆبم یان هی جەردە."

ئانکۆ هەروەک دیار کەرینی ب دەرد، مەحنەت و ئێشان دیارکریە و تا رادەیەکێ د کەسوکیکرنا کەریدا، کەرێ خوە وەک قارەمانێ هەلبەستێ برەنگەکێ گەلەک ژیرانە ژی نیشان دایە کو بریارێ ددەت و باشی و خرابیا ژێک جودا دکەت.

پتر ژ دوو دەهکان ژ وێ هەلبەستا وی دبۆرن و ئەڤسال ب داهێنانەکا نوو پەشێو جارەکا دی ب فەلسەفا کەرینیێ ڤە دهێتە مەیدانێ، لێ ئەڤجار بۆ سڤککرنێ هندەک پێشڤەچوونێن دی بخوەڤە دیتینە. بەلکو هون هزر بکەن کو ئەڤ پێشڤەچوونە د ستایل شیواز و کلتورێ ویێ نڤێسانێدا پەیدا بووینە بۆ وێ یەکێ کو پتر شکاندنێ بکەت؛ لێ ب داخڤە وەسا نینە. ئەڤجارە بۆ پتر شکاندنێ، نە وەک هەلبەستڤانەک، نە وەک نڤێسەر یان رەوشەنبیرەک، لێ برەنگەکێ نە گەلەک دوور ژ هەمو بیرێن پاشڤەمایی، فاناتیک و کەڤنەپەرستێن دناڤا جڤاکیدا هەین، پەشێو ژی ژ بۆ پتر شکاندنێ کەرێ خوە کرە ماکەر. ئانکو ژ کەری خرابتر: ماکەر! بڤێ تەکنیکێ شعرەک بناڤێ "ماکەر سیتی" پێشکێشکر و ئەڤ دەربرینە بۆ شوبهاندنا هەڤلێرێ و وەسفکرنا وێ بکارئینا.

هەلبەت خواندنا شعرێ و گۆتنا دەربرینا "ماکەر سیتی"، هۆلا پری مرۆڤ ب دەنگێ چەپلەقوتانان دهێتە داگیرکرن و خەلکێ هەڤبیر و هەڤ ئاست دگەل ویدا ب گەرمی پێشەوازی ل شوبهاندنا وی و دەربرینا وی کرن و پەسنا وی بۆ هەڤلێرێ وەک "ماکەر سیتی" ب بلند نرخاندن و بڤی رەنگی د ئەتموسفیرەکێ پری چەپلە و دەستقوتاندا، دناڤا جەرگی هەڤلێرێ بخوە، پایتەختێ هەرێمێ ب ماکەر سیتی هاتە وەسفکرن.

جارێ کەلتورێ ب کەر ناساندن، ب کەر ناڤکرن، و ب کەرینی کریارکرن کا چەوا بەربلاڤە و چ کارتێکرنان دکەت هەمو ل ئالیەکێ، لێ ئالیێ  باڵکێش ئەوە کو بەلاڤکرنا ڤان جۆرە دیتنان ژ بال کەسەکێ کو خوە ب هزرمەند دزانیت نە بتنێ کێماسیەکا مەزنە لێ هەڤدەم نە هەستیاربوونا وی بەرامبەر رەگەزێ مێ و بێرێزییا وی بەرامبەر ژنێ دیاردکەت، کو ئەڤە نزانم چەوا ژ پەشێو بهێتە قەبولکرن. زێدەباری وێ گریمانێ کو ژ ئەرکێن نڤێسەری پەیداکرنا وان بوهایانە یێن کو خزمەتا مرۆڤاتیێ دکەن، نە وەکو نووکرن و بەربلاڤکرنا کەڤنەپەرێسی و هزرێن فاناتیکی. داهێنانێن ڤی مەزنە شاعری د بیاڤێ کێمکرن و شکاندنا ژنێ هەر لڤێرە ناراوەستن. ب دیدەڤانییا هندەک ئامادەبوویان و هەروەسا ب ژێدەر وەرگرتنا ڤیدیویێن بەلاب د ئینتەرنێتێدا، بەرییا چەند سالان ژی ل ستوکهولم، پەشێو د کورەکێ هەلبەست خواندنێ دا هەلبەستەکا خوە تەرخان دکەت بۆ کرێتکرن و جڤێندانێ ب هەڤژینێن هند ژ سەرانێن شەرێ براکوژیێ. و ژ سەر تا بنێ ڤێ هەلبەستێ پری جڤێنانن بۆ ژنێ. ئەم هەمو براکوژیێ ئیدانە دکەین بەلێ پرس ئەڤەیە ئایا چ رێکێن دی ژ بلی جڤیندانێ نینن؟ ئانکو چ جڤینێن دی نینن کو کارتێکەرتر بن ژ جڤینێن کو بۆ ژنان دچن؟ بۆچی جڤینان نابێژیە سەرکان بخوە؟ بۆچێ ژنێن وان؟ ڤیدیووێن پەشێوی و ڤێ هەلبەستێ لسەر یوتیوبی هەنە و ژ نشکاڤە بەرچاڤێن من کەفتن، لێ پرسەک بۆ من پەیدا دبیت: ئایا گەر ئەوێن خوە ب هزرمەند دزانن دڤی ئاستیدا دەربرین و رەفتارێ بکەن، پا یێن دی چ بکەن؟

ڤالە فێستیڤالێن زانکۆیێ و هەڤبەرکرنا دیمەنێن جودا

محەمەدعەلی یاسین تەها

 ل کوردستانێ ئاستێ زانکۆیان ژ گەلەک ئالییانڤە لاوازە، و بەڵگە و گرۆڤە ژی بۆ ڤێ گۆتنێ گەلەکن. لڤان داویان مژوولبوونا زانکۆیێن مە ب ڤالە فێستیڤالان و پشتگوهـ هاڤێتنا ئالیێ زانستی و ئەکادیمی ئەز نەچارکرم ڤان دیمەنێن جودا بئێخمە بەرچاڤێن خواندەڤانێن هێژا و کەسانێن د بیاڤیدا کار دکەن، ب هیڤییا بجهبوونا وێ گریمانێ کو بەرچاڤکرن و ڤێکەفتنا ئاریشێ، نیڤا چارەسەرکرنا وێیە. دڤان دیمەنێن لخوارێدا هەڤبەرکرن و حوکمدانێ بۆ خویندەڤانێنن هێژا دهێلم:

دیمەنێن گشتی:

ل زانکۆیێ:

ئەڤرۆ ژ کۆنفرانسەکێ زانستی دەرکەفتم، بەری هەفتیەکێ پشکداری ئێکا دی بووم و هەفتیا بهێت کونفرانسەکێ دیێ زانستی ل ژڤانە: ئەڤەیە دیمەنێ ژیانا ئەکادیمی و پێشڤەبرنا ئاستێ زانینێ دەما تو ل زانکۆیێ بی، چ وەک قوتابی، چ وەک ماموستا یان ڤەکۆلەرێ ئەکادیمی. ئانکۆ بیاڤێ ئەکادیمی بەردەوام پێدڤی ب ڤەکۆلینان هەیە ژ بۆ پێشڤەبرن و باشتر لێکرنا کوالیتیا زانستی.

ل زانکۆیێن کوردستانێ:

 ئەڤرۆ کۆرەکێ "؟" خواندنێ بوو، هەڤدەم سەیرانا فلانە فاکۆلتیێ بوو و فاکۆلتیا دیژی ئاهەنگا هەڤنیاسینێ هەبوو. بەری هەفتیەکێ شانوگەریا پشکا فلان و فێستیڤالا فاکۆلتیا دی و بەریکانا جوانترین ترۆمبێل لسەر ئاستێ کەمپا زانکۆیێ بوو زێدەباری ئاهەنگا رۆژا زانکۆیێ. هەفتیا بهێت ژی ئاهەنگا وێنێ دەرچوونێ یە، هەڤدەم ئاهەنگا رۆژا قوتابیانە، هەروەسا مێهڤانداریا قوتابیانە بۆ هندەک ماموستایێن هێژا.

" ئەگەر بۆ نموونە بتنێ زانکۆیا دهۆک بێژم کو من سەربۆرا دەهکەکێ لگەل هەیە، لدەستپێکێ وەک قوتابی و پاشان وەک فەرمانبەر و نهۆ وەک ئەکادیمی و ماموستا و هەروەسا هەڤبەریا وێ لگەل زانکۆیێن جیهانی بکەم کو من دەلیڤەیێن خواندنێ لێ هەبوونە، هەر دوو دیمەنێن لسەری ب باشی و بێ کێمترین زێدەیی دئاخڤن. هەڤدەم ئەگەر هەڤبەرییا رۆژهژمارا کارێن ئەکادیمی و یێن تەرفیهی ل زانکۆیا دهۆکێ بهێتە کرن، دێ ئالیێ تەرازییا چالاکیێن ئەکادیمی ب لەزەکا سەیر بلند بیت د دەمەکێدا کو ئالیێ تەرازییا چالاکیێن تەرفیهی دێ بارگرانیێ کەت و دانیشیت. ئەڤە د دەمەکێدایە کو گرنگیا ئاهەنگ، شاهی، شادی و چالاکیێن قوتابیان و زانکۆیێ کێم ناکەین، لێ پێشخستنا ئالیێ ئەکادیمی و زانستی بێ دوودلی دڤێت پێشەروویێ هەر چالاکییەکا دی بیت."

دیمەنێ قوتابیان:

ل زانکۆیێ:

ئێک ژوان گۆت: من پەرتوکا فلانی ب باشی خواند لێ باوەر دکەم فلانیێ دی برەنگەک باشتر ڤێ تیۆرێ شرۆڤە دکەت. یێ دی گۆت: دڤێت بزانین بۆچی پەرتوکخانا ئەلیکترونی د وەرگرتنا هندەک فایلاندا نە گەلەکا کارایە. ئێکا دی هەڤاێن خوە پرسیارباران کر: هوون د ئامادەنە بۆ پێشکێشکرنا سمینارا گرۆپێ مە ل هەفتییا بهێت؟ ل کیڤە کوم ببین بۆ کارکرنێ؟ چەوا بریارێ لسەر بکارئینانا ژێدەران بکەین؟

ل زانکۆیایێن کوردستانێ:

ئێکێ گۆت: من نەدزانی دێ کەنگی موحازرە خلاس بیت دا تێلەفۆنا خاتینا خو بکەم، ژێ خەریب ببووم. یێ دی گۆت: مالا تە سەیدا چەندێ بێبەختە، بیسسسست بەرپەر یێن داینە مە بۆ ئەزموونێ. ئێکا دی هەڤالا خوە پرسیارباران کر: تە نینۆکێن خوە ل کیژ سالۆنێ بۆیاغکرینە؟ پرچا من جوان هاتیە ئەڤرۆ؟ نزانم دێ سبە چ کەمە بەر خوە ؟

"هەلبەت د هەردوو دیمەناندا، چ ل زانکۆیێ یان ل زانکۆیێن کوردستانێ حالەتێ دی ژی هەیە، لێ حالەتێ دیێ هەر ئێک ژوان، ژ یێ دی لاوازترە."

دیمەنێ ماموستایان

ل زانکۆیێ:

ئێکێ دپرسی: تە دووماهیک هژمارا فلانە گۆڤارا زانستی خواند؟ تو دبێژی ئەو دیتنا فلان ڤەکۆلەری لدۆر فلان تیۆرێ بشێت جهێ خوە د جیهانا ئەکادیمی بکەت؟ تو هزر دکەی لاوازیێن تیۆرا کەڤن و یا نوو ب دروستی دیار بووینە؟

یێ دی بەرسڤ دا: ئەڤ هەردوو پرسە گەلەک د گرنگن، ئەم دشێێن لسەر ڤان پرسان مێتودەکا زانستی بکار بینین بۆ پشکداربوون د ڤێ تیۆرێدا برێکا بەلاڤکرنا ڤەکۆلینەکێ، دڤێت کار تێدا بکەین بۆ هژمارا بهێت یا گۆڤارێ ئامادە ببیت.

ل زانکۆیێن کوردستانێ:

ئێکێ نامەیەکا مۆبایلێ بۆ یێ دی هنارت: پرۆفیسۆر، دکتۆر، ماموستا، زۆر بەرێز و هێژا ئەڤشەڤە بچێنە سەنتەرێ رەوشەنبیری بلیاردێ بکەین؟ بلیاردەکا نوویا ئینای ب بیسسسسست هزار دولاران یا کری، گەلەکا خوشە، ئەز شڤێدی لوێرێ بووم.

 یێ دی بەرسڤدا: پرۆفیسۆر، دکتۆر، ماموستا، زۆر بەرێز و هێژا، وەرە ئەزێ لوێرێ.