پەیاسە

پەیاسە

محەمەدعەلی یاسین

پەیاسە

بازارێ جاران بوو، بێهنا قیمێ خاڤ، دووکێلا جگارەیان و چایا سوتی تەڤلی هەڤ ببوو. دێم و روخسارێن لهەڤچوویی و دامایی یێن کرێکاران چاڤێن من ژ زارۆکینیێ زارۆکتر لخوە دکێشان. هێشتا پانکا ب کەپرا خوارنگەهێڤە د بزاڤا کشکرنا مێشاندا یا بەردەوام و سیرسیرا وێ دگەل دەنگێ کەفچکێن زەلامێ لبەر دەرگەهی تێکهەلی گازیێن ویێن لدووف دبیت "کەرەمکەن برا؛ قوزی، تەشریب، قەلی لسەر برنج، قەلی سێل".

- ئەز لڤی باژێری نامینم، نەشێم بمینم. باژێر و مرۆڤێن وێ گەلەک د بچووکن و ئەز ژ هەمووان بچووکتر. هێشتا باوەر دکەم کو هندی باژێر بچووکتر بیت خەم، ئازار، و ئاریشێن وێ مەزنترن.  Message Sent

New Text Message  : دێ چییە وێرێ؟

- ئەرێ، دێ چمە باژێرێ مەزن دا بچووکتر بئێشم. Message Sent

د کۆلانێدا لبن شرشرا ئاڤا تانکێن شکەستی، توزا لسەر جاما پشتێ یا ترۆمبێلێ ب تلێ هاتبوو ڤەکۆلان "خێرە من بشوو"، خوارتر بەرسڤەک ژی هاتبوو "ببۆرە ئاڤ ناهێت".
خوتبێ بەردا. ژ قەرەبالغا ژن و زارۆیێن کو ژ مزگەفتێ دەردکەفتن, و ب هۆرێنا قورتال بووم. وێڤەتر ل پشت دەستێ سوتیێ پولیسێ ترافیکێ لبەر هەتاڤێ راوەستیام.

 New Text Message  : ئەز بێژم نەچە
- پا چ بکەم؟ Message Sent
 New Text Message  :لهەمبەری براوەستە، مواجهێ بکە.
- راوەستیان لهەمبەری ڤان مرۆڤان خوەکوشتنە. مواجها چی، ئەڤە نە واقعە، ئەڤە کارەساتە. Message Sent
 New Text Message  : بۆ وان براوەستە یێن تو دڤێی، یێن چاڤەرێ تە مواجها وان جوانییان بکە یێن کو هێشتا ماین.

-          توژی وەرە

ـ Message Failed